Evan Almighty ~ Bruce Almighty既第二集。一套好有意思既福音喜劇。上一集 (Bruce Almighty) 由Jim Carrey主演。講述神睇中由Jim Carrey飾演既新聞報導員被解僱後答應幫神代替神做兩星期既工作﹐結果攪出一個大頭佛﹐但係神令佢明白人生一D好重要既野。今次﹐Evan Almighty由Steve Carell主演。係上一集﹐ Steve Carell飾演Jim Carrey既死對頭 ~ Evan﹐兩個一齊爭首席主播﹐ Jim Carrey離開之後﹐ Evan成功參選議員﹐成為國會既一員。身為議員既Evan同家人搬到新既地方居住。當事業﹐家庭﹐財富都得心應手既時候神選擇左Evan。今次神竟然要Evan做一隻方舟。好多人都聽過Noah’s Ark既故事, 相信睇呢套戲既時候都大概知道係咩野事。可能我係基督徒既關係﹐睇呢套戲令我十分感動。戲中有一段我好有共鳴。神係快餐廳同Evan既太太講既一段話。作者都Noah既故事用另一個角度解釋。好多人認為神當初叫諾亞做方舟係因為神憤怒了。但係作者卻話神叫各種各樣既動物一對對甘上船其實係愛既表演。就好似諾亞一家甘團結。同時以下一段我覺得好touch:

神對Evan既太太講:

“If someone pray for patience, do you think God just give them patience?  Or does God give them the opportunity to be patience?

If they pray for courage, does God give them courage? Or does Gove give them opportunities to be courage?

If someone pray for family closer, do you think God just warm with the feeling? Or does God give them opportunities to love each other?”

無錯! 神係唔會對妄求既人有所回應。因為神唔會直接回應人既要求。相反﹐神會施予機會令到人明白佢既大能。所以我覺得呢段說話好正。係成套片既中心。就係因為Evan當選議員既時候話要改變呢個世界 (change the world!)﹐所以神今次選中左Evan去做一隻方舟。當然過程係笑料百出﹐但係最後結局令人有一定程度既驚喜。所以誠意推薦Evan Almighty呢套戲。亦希望呢套戲可以令更多人有一定既反思。 ^^

今日被Man Power聘用做event helper一日。 兩點鐘到灣仔點名﹐ 知道要換制服。 雖然之前有通知﹐ 但係估唔到要穿水手服(男性水手) 。 因為今次event個老闆係威尼斯公司﹐ 所以要扮威尼斯水手黎配合今次生意既主題。  甘大個仔都未試過做份甘既工。  不過有D做鴨既感覺﹐ 因為件衫好緊身﹐ (為突顯水手既肌肉﹐ 不過就凸顯左我D肥肉) 所以有種犧牲色相既感覺﹐ 不過又覺得幾好玩﹐ 真係矛盾….. 

今晚成個event只好用紙醉金迷黎形容。  因為今晚既客人全部都係大公司既大客。  好多名牌子﹐ 出名既品牌公司都有派人出席。  所以開始時都有D緊張。 不過我好彩﹐ 係reception度做迎賓個度有幾個意大利人係度迎賓。 佢地好nice, 好有energy。  所以我都放鬆左﹐ 又做得好開心。 由君悅酒店負責既到會服務實在高水準。 所有侍應都好嚴肅﹐ 排隊甘服務客人。 今晚紙醉金迷係因為有特色﹐ 精緻既食物﹐ 酒水 (紅酒白酒)﹐有水吧服侍客人。 有廚師既專人服務食物比客人。 另外有冰雕(雖然溶解中)﹐ 有表演 (包括雜技表演 ~ 拋波﹐ 拋樽﹐ 踩高橋﹐ 踩單輪單車﹐ 真人人偶﹐ 男高音﹐ 女高音) 。 仲有之前同我一齊做reception既意大利人都係表演嘉賓(唱歌) 。 我仲同佢地做左朋友﹐ 不過無交換contact!  (後悔後悔!) 整個event分上下兩場, 之後仲有好多時間比客人social。 有DJ打碟﹐ 好似Disco甘。 以上所有既野。。。 我地呢D水手當然無份。 但係成晚都有餐免費McDonald食﹐ 仲有杯幾好飲既白酒﹐ (不過我唔好杯中物。。  too bad!) 而且可以拿走一D禮物。 真係又食又lik!  (不過可惜。。  本來見到一D好靚既玫瑰花﹐ 但係當我做完野已經比人拿走左﹐ sigh!)  不過今晚都係一個難忘既經歷﹐ event工可以成日都係甘就好啦!  ^^

星期六被邀請參加一個非謀利機構叫做 “無國界魔術義工團”.  星期五有一位小姐打電話比我同我講﹐第一次meeting將會係兩點係旺角會堂﹐即係朗豪坊天橋對面三樓。  當時我諗係係朗豪酒店。所以我兩點就行過朗豪坊既天橋到朗豪酒店﹐因為唔識路﹐所以問D職員à 一位穿得好專業既酒店小姐.  我問佢知唔知道無國界魔術義工團既meeting係邊﹐佢話比我知係42樓。當時好奇怪﹐但係既然佢話係42樓﹐甘就上去探下啦。  上到去﹐見到好多穿西裝既先生女士﹐心知不妙 (我當時穿既係golf shirt加牛仔褲).  但依然鼓起勇氣走到reception度問個度係唔係無國界魔術義工團既meeting.  個reception又好攪笑甘叫我睇下有無我個名既name tag (reception張抬有好多name tags).  我話無﹐佢又好攪笑甘話唔緊要﹐之後叫我寫自己個名係一個空白既name tag個度。仲比左一份小冊子同一支筆比我。但係之後我就發覺越來越唔對路。點解係42樓?  點解D人會穿得甘formal呢?  當我行入去就發覺完全唔對路﹐因為我見到有自助餐﹐除此之外我仲見到大量外籍人仕 (簡稱鬼佬) 在場。  這場面把我嚇呆了。  我當然立刻打退堂鼓啦。  之後打電話先知原來朗豪坊有兩條天橋﹐結果遲左20分鐘。  雖然第一堂既魔術我全部都見過﹐但係魔術神奇之處唔係個魔術既秘密﹐而係表演既型式同觀眾既反應。  所以都OK既。  我鐘意學魔術就係甘解。

無國界魔術義工團

一個希望透過魔術表演服務香港既非謀利組織。參加者除可以學到魔術表演外，更可以到老人院、醫院、孤兒院等服務，義工團將會於7月21日逢星期六下午開始，於旺角學習魔術表演及預備服務。 

星期四同Diana一齊去左睇Harry Potter5之鳳凰會的密令.  因為之前同佢一齊睇Harry Potter4. 所以今年諗住約埋一齊睇Harry Potter 5。 Harry Potter電影系列已經出到第五集﹐但係依然十分出色。 Harry Potter既世界擁有無限既可能性﹐雖然已經到第五集﹐但係全片一D都唔沉悶﹐反而不斷有唔同既驚喜比觀眾。相信魔術都應該有甘樣既精神。  難怪作者可以由綜援生活轉眼變成坐擁十憶身家既富豪。  HP5內容唔想多講﹐但係始終覺得太短﹐唔能夠將全書既內容放在片裡始終有D可惜。  不過片裡面既魔法畫面做得好出色。  如果IMAX有位而我又有錢的話﹐我真係想再睇多次﹐再進入HP既世界。  不過已經到第五集﹐  Harry Potter仲有兩集。 

十分期待最後既結局 ~ HP6 à the Half Blood Prince and  HP7 à the Deathly Hallow! 

今日比我表妹叫醒左, 因為應承左幫佢補習. 之後就飛左去奧海城, 一教就教左三個幾鐘.  之後就去左探婆婆.  去左麥當勞婆婆屋企玩左陣間, 之後陪佢睇電視, 但係睇睇下訓左.  hahahaha....  婆婆好笑, 立刻打比我家姐同我呀媽, 靜靜雞話比佢地知我訓左, 哈哈.