今日一早走左去HKU。  原來如果唔食早餐就坐巴士﹐ 結果就會暈晒浪甘落車。 今日係我正式係HKU番學前既視察日。 因為要攪學生證﹐ HKU比想像中容易去﹐ 所以都OK。  今朝一早係HKU聽一個電腦講座﹐ 實在太悶啦!  但係用電腦set up個account就攪左我成三個鐘。  不過終於攪店晒要setup既野。  我覺得我真係同魔術有緣。  本來只係為左整張學生證先去HKU﹐ 點知係座building門口就有個魔術學會既booth係度召集會員。  就係甘我就入左HKU既magic club。  hahaha!!!

夜晚約左Janet食越南野。  OK好食。  食完野同佢玩左幾個魔術﹐ 佢都睇得好開心。  但係玩完之後佢忽然好唔舒服﹐ 仲想嘔。  所以我就送左佢番屋企﹐ 希望佢好好休息啦!  Don't make me worry, k?!  ^^  Take care! 

日本魔術師小山富士雄講座

星期一夜晚同成班魔術朋友一齊去左日本魔術師小山富士雄既講座。  由於係日本人既關係﹐ 所以需要一位翻譯係佢身邊。  唔知係唔係先入為主既心理﹐ 始終覺得呢個lecture麻麻地。  唔係話小山富士雄先生唔好﹐ 只係覺得好多野都好唔PRO!  大會老細又怪怪地, 個翻譯又唔識做﹐ 聽完小山富士雄講完﹐ 都唔係完全將佢要講既講出黎。  又唔係好識魔術﹐ 所以有D名詞都唔識解釋﹐ 所以覺得成個大會好唔organize。  不過好意欣賞魔術係一種開心﹐ 一種享受。  OK 啦! 

星期六日同埋成班朋友一齊攪左個魔術camp.  資料如下

What: 長洲魔術營

When: 2008.08.11-2008.08.12

Where: 長洲 (of course)

Who: King, SL17, Dan, Kelvin, Karry, Alvin, Ivan, Jeff, 五, K, Cherry (Sunday)

How: 玩+魔術

大埔魔術show

本來諗住星期六一早就入長洲﹐但係星期五晚見到Ariel個blog度見到星期六朝早係大埔超級城有魔術表演﹐所以就立刻扯大隊去大埔睇show.  真係一個Bonus!  今次魔術show係由兩位澳洲既魔術師 ~ Tim Ellis and Anne Webster合力演出。  表演雖然係公開係公共廣場﹐但係因為可以用5蚊做善事﹐又可以有位坐﹐ 又可以有包糖﹐所以我地好樂意。  表演內容包括變錢﹐飄浮羽毛﹐漂浮檯﹐漂浮助手﹐火銀包﹐ 10蚊變20蚊﹐空氣水罐還原﹐凌空變酒樽﹐ vanish氣水樽﹐針穿氣球﹐刀鋸魔術師。。。等。  Tim Ellis個樣好熟﹐唔知係邊度見過。  場show幾好睇﹐所以無後悔甘遠水路去大埔。  之後就出發去長洲。。。

盲公竹

結果三點幾先到長洲。  係碼頭接我地既係阿欣既朋友既朋友 ~ 小明。雖然大家都係第一次見﹐但係小明係一個好友善既人。  友善到一D都唔覺得陌生﹐反而覺得唔似第一次見面。  好幸運有佢做我地既 “盲公竹” 。  好多謝小明。

燒烤

雖然宜家都唔係好記得camp裡面既每一件事﹐ 比較記憶深刻既係可以係長洲同D朋友一齊燒野食。  一來我好耐無燒過野食﹐ 二來小明既熱情招待令我對呢餐燒烤好enjoy!  因為基本上可以唔晒諗要點買野﹐ 食D咩野﹐ 一切都有好似一條龍服務甘既招待﹐ 而且唔係好貴﹐ 所以覺得既好。

大頭妹

經SL17介紹﹐ 我地去左由風之后李麗姍既舅父開既餐廳﹐ 係東灣沙灘既盡頭﹐ 可以望到成個沙灘﹐ 個景好靚。 不過D野好貴﹐ 但係可以係一個唔係好熱﹐ 有D海風﹐ 又唔晒既下午﹐ 望住個海﹐ 又有D凍飲同小食﹐ 真係好relax, 好舒服。  令我最深刻既係呢度既侍應﹐ 雖然係暑期工﹐ 但係呢位侍應好叻。 佢 ~ 係一個讀小學既小朋友﹐ 一位好cute既細路女。  初初見佢我以為佢係男仔﹐ 但係當我地問佢叫咩野名既時候﹐ 佢話叫佢做”大頭妹”, 所以先知佢係女仔。  但係呢個女仔好cute, 好叻女。  小小年紀就識落單﹐ 將食物放到檯上面﹐好得意。  佢笑起上黎又好甜﹐ 可以肯定佢將來一定係位靚女。  Hehehe!

另外就當然係魔術啦。  呢個係以魔術為主題既camp嘛。  我地自己攪左個魔術比賽﹐ 每位都要玩一個魔術黎較量﹐ 再由每一位觀眾投票選出最首歡迎既一個魔術。 雖然好想寫低每一個魔術﹐ 但係因為太多野啦﹐ 所以不能盡錄。 但係好笑既係因為我地住既地方係東堤﹐ 甘岩大家魔術既主題唔多唔小都同神怪有關﹐ 所以有一種神秘既氣氛籠罩住呢個比賽。 我玩既魔術係同啤牌有關﹐ 但係之前要燒一張紙﹐ 結果都比人話做咩野玩呢D野呀﹐ heehee!  好幸運﹐ 我這個魔術成為當晚最受歡迎既魔術﹐ 好開心﹐ 好榮幸。  多謝大家既支持同鼓勵。  最後我地都對大家既魔術作賽後檢討。  我鍾意大家呢種態度。 希望將來再有機會再玩啦。

小長城﹐ 睇岩石

第二日去左小長城睇岩石。  因為時間唔係好多﹐ 而且好熱﹐ 所以唔係行左好遠﹐ 不過就係甘影相﹐ 我勁鍾意呀5既表情。  超正!  但係由小長城望去東灣既景色實在唔錯﹐所以值得行上去睇。 

食海鮮

因為由小長城行返去碼頭既時間長左﹐ 所以本來諗住食午餐變左食tea。  由小明介紹食海鮮﹐價錢當然唔係好貴﹐ 而且味道都唔差。  我地食左唔係好多野﹐ 因為沿路返碼頭見到D小食忍唔到口﹐ 食左D特大魚蛋﹐ 糕點等。  所以大家唔係話好好好肚餓﹐ 但係都買左D海鮮到大排檔煮。  有瀨尿蝦﹐ 中蝦﹐ 蟹﹐ 蜆﹐ 等等。  食完海鮮﹐ 時間都唔早﹐ 所以我地就坐船返中環。  結束我地既長洲魔術camp。 

今年生日好特別。 因為我今年生日有幸可以同兩位世界級既魔術師過。 Heehee!  我覺得呢個機會好難得﹐ 所以覺得好榮幸。  今日一早同Michael Ammar同Steven Kline同Catherine一齊去左旺角。  當然我並非一個人啦。  Ariel同嘉朗都好樂意join埋一齊玩。  午飯去左食點心。  魔術師比人既感覺係神秘﹐ 不可告人的﹐ 但係兩位魔術師既大人物好nice, 而且好攪笑。  魔術師始終係魔術師﹐ 連諗既野都會成日同魔術有關。  好似係KCR﹐ Steven同Michael就係度研究點樣Palm住張火車飛。 係酒樓﹐ 我地叫左一D白兔形狀既點心﹐ Steven就拿起帽扮係頂帽裡面變出隻白兔出黎。  真係笑死我啦。

同左佢地去左女人街同花園街。  佢地好滿足甘買左D手信。  之後就同佢地番沙田。  好倦。  不過好開心﹐ 因為呢個生日有兩位甘特別既人同我過。好開心可以識到佢地﹐ my honor and my pleasure! 

好多謝所有同我講Happy Birthday 既人 (包括Michael, Steven and Catherine)。 

Ariel, 多謝妳既禮物。

SL17﹐ 多謝妳個蛋糕﹐ you always surprise me!  Thank you! ^^

甘大個仔第一次參加魔術講座。 估唔到我既魔術人生第一個聽既講座講師就係世界第一近距離魔術既冠軍 ~ Michael Ammar.  好開心!  真係好勁!  聽佢既lecture真係好正!  學左好多野!  多到真係要D時間比自己好好吸收。 Michael Ammar既魔術世界真係好利害!  佢既動作好自然﹐ 而且每個動作都有原因﹐ 但係如果佢唔講﹐ 真係唔知原來佢甘做係有原因。  所以好開心﹐ 有種係疑團裡面解放既感覺。  不過佢D野就好貴﹐ 貴到唔捨得買。  不過將來如果再見佢﹐ 我又有錢的話﹐ 我一定會買!  好幸運成為佢其中一個互動觀眾﹐ 可以有一張有佢簽名既card!  好有紀念價值!  ^^ 

魔術節既第一晚﹐ 我地全部人係蘭桂坊既一間叫80年代既餐廳+吧裡面食野。好耐無去過蘭桂坊﹐ 自從上年年尾之後都無去過。 今晚好幸運可以同一大班魔術師一齊食飯。 當然﹐ Michael Ammar 同 Steven Kline都係度啦。 個度有一隊好正既band同歌手係度唱一D 60s-80s 既流行曲 (eg. Sad movies, Unchain melody…), 因為呀媽鍾意聽呢D歌﹐ 所以我由細開始就有聽開﹐ 所以呢D歌一D都唔陌生﹐ 相反有種親切感。 (雖然我唔知個D歌既名…) 食左個西冷牛扒 (OK好味啦), 之後就係期待左成晚既Michael Ammar個人show, 雖然佢都係做番魔術節個套魔術﹐ 但係Michael Ammar既魅力就在於你唔會覺得悶﹐ 幾多次都係甘正!  當然﹐ 佢仲玩左D新野啦!  所以魔術世界真係神奇﹐ 廣闊﹐ 博大精深!  之後有一段Social既時間. 唔知係因為大家坐耐左﹐ 所以無甘陌生﹐ 還是夜了﹐ 大家玩得比較放﹐ 所以開始玩埋一齊﹐ 不段影相。  係個度認識左Steven 同佢助手 ~ Cat!  佢地好nice, 好健談。  之後輪到Steven Kline既個人秀, 係魔術節只係見佢玩舞台﹐ 有機會見埋近距離既魔術表演﹐ 有種食全餐既感覺!  Steven出色既地方除左魔術了得之外﹐ 仲有佢既急智同佢既互動!  佢既表演真係好好笑.  表演結束後﹐ 番屋企﹐ 好倦……. 

每年夏天係會展都會有一個weekend由宏亮魔術學院舉辦既魔術節。 之前兩年都有黎﹐ 為既係滿足自己既好奇心﹐ 但係今年比較特別。  因為我買左個VIP package。 雖然好貴﹐但係我真係覺得值得。  因為可以出入會場任何地方 (除左後台) 。  今年有幸可以欣賞兩位世界級既魔術師表演。 Michael Ammar (World Champion Magician) 同 Steven Kline & Catherine (World of Magic).  能夠有機會見到世界級既魔術師既表演實在開心得難以用筆墨形容.  而且可以多次近距離欣賞﹐ 實在係一個難得既機會.  今次Steven Kline做既係舞台既魔術 (有Card, 有繩, 有大型幻覺魔術), Michael Ammar 表演既係近距離魔術 (Coin through the bottle, elastic magic, card trick, cups and balls).  兩位魔術師表演既都係一D好普通既魔術﹐ 但係兩位大師都玩到出神入化﹐ 一D破綻都無。 真係百看不厭.  我仲問埋兩位魔術師既簽名照.  同埋一副有Michael Ammar簽名既牌.  除此之外﹐ 仲有多位本地魔術師既表演, 包括跳舞同魔術crossover 既余凱緯 (Cyrus), 有白鴿魔術既李行齊 (Avon), 玩CD魔術既文奕凱 (Adrian), 玩Zombie Ball既陳偉建 (Kenneth), 仲有好多魔術師係小劇場同其他攤位到表演魔術。 我都有份玩呀!!  ^^  為期三日既魔術節﹐ 感覺有D似去魔術camp.  因為日日見住同一班人﹐ 一齊玩﹐ 一齊研究魔術. 所以感覺好好﹐ 而且今年買package, 所以有種VIP既感覺.  Haha!  實在覺得物有所值.  總括黎講﹐ 除左有小小事之外﹐ 一齊都十分愉快﹐ 又學到好多野﹐ 又可以識到好多朋友﹐ 所以幾好啦! 

有一次因為想唱K﹐ 所以上左Greenbox 既網站。 巧合地比我發現有一個叫做萬世頌聲既基督歌曲卡啦OK大賽。  因為好耐未玩過﹐ 而且第一次見到有基督教既歌曲比賽﹐ 所以走左去報名。  結果星期六去左Audition。 今次唱既歌係由張崇基﹐ 張崇德主唱既歌﹐ 叫 “神! 祢在掌管”  好鍾意呢首歌﹐ 因為呢首歌個feel好似 “足印” 既故事。  而且有一段話所有野都有神所掌管﹐ 有神既預備﹐ 所以我唔需要怕﹐ 只要信。

神!祢在掌管

曲：吳秉堅 詞：趙孟準 主唱：張崇基 張崇德

我望著前路，是迷亂悵惘一片，

幾多挫折打擊，未明白造物旨意。

我踏著細沙，在海邊走過，

晚風中心裡聽祢聲。

聽颯颯海風，在寧靜細語低訴，

眺望滔滔海波，在無言默默宣告。

主浩大能力，海天皆響應，

每一刻變幻亦在祢的旨意裡，

神!祢在掌管時間萬有空間，

在祢的手裡一切定有時。

神!我的一生，神祢定有預備。

莫計得失只想祢來導引。

今次評判有創世電視﹐ 影音使團﹐ 同music 2000。  不過我可能太緊張吧!  音太震﹐ 所以麻麻。  希望入到啦! 

As long as 只要我summer係香港﹐有兩段時間我一定會係會展。  第一係書展﹐第二就係動漫展。  我唔係一個100%既讀書人﹐但係我鐘意打書釘。  如果我有多D時間﹐耐性同恆心的話﹐我有諗過寫下小說。不過暫時只有idea﹐並無意實行。  Hehehe!  香港書展 ~ 今年口號係 “閱讀香港” 。雖然年年書展都係差唔多﹐但係每次行得入去總會買到野。同往年一樣﹐今年書展有四個halls.  分左兩日去﹐因為第一日(星期四)只係行左五粒鐘﹐但係只係行得個Hall 1。所以星期日再去多次。 今年雖然唔係買左好多野﹐不過都用左幾百蚊。 收穫有書展紀念封 (每次去書展都會買。  今年既紀念封有四款﹐ 分琴棋書畫四種圖案。  所以好有特色同紀念價值) 。  另外買左一本好得意既書 ~ answer book。  呢本書每一版既左手邊都有一句話。  特別之處係呢本書主要既用途就好似求籤甘﹐ 只要雙手hold住本書誠心諗住一個yes or no既問題﹐ 之後打開本書就會有一個答案比妳。  我試過﹐ 有時都覺得幾準﹐ 所以覺得幾好玩。 仲有買左一隻叫Mimi既福音歌手既CD﹐ D歌都幾好聽﹐ 唔錯唔錯.

本來諗住動漫節最後一日先去﹐ 但係Diana問我同唔同佢一齊﹐ 所以同埋一齊去。 動漫節同以往既差唔多。 除左隨處會見到好多好多古靈精怪既Cosplay﹐ 仲有好好睇既The One Dancing Competition。 不過今年比人玩既攤位好似多左﹐ 地攤少左。 但係有一樣野係無變既就係好多人。  希望下年可以分兩個Hall或者會好D。  不過收穫都唔錯。  買左好多平漫畫﹐ 好正。 最仲要既係有好多好得意好靚既Figures。 包括有好得意既加勒比海盜﹐ Star Wars Character﹐ 仲有成成舅父用鐵線勾出黎既Lord of the Rings既怪獸頭。  好厲害呀!!!  今年仲玩集體回憶﹐ 展出左好多80年代既玩具, 好懷念!  走入去Lego Store﹐ 今年展出左好多個lego figures。 包括芝麻街既公仔﹐ 麥當努既漢堡神偷。。。  遲D post 相!